PSJ-nin sabiq futbolçusu Lionel Messinin ilin əvvəlində məşq zamanı parisli müdafiəçi Vitinya ilə sərt danışdığı və hətta bu səbəbdən klubdan getməyi belə düşündüyü məlum olub.

İndex.az xəbər verir ki, bu barədə “L Equipe” yazıb.

Qeyd edilir ki, məşq zamanı futbolçular arasında qarşıdurma yaşanıb. Nəticədə Messi portuqaliyalıya kobud şəkildə cavab verib: “Sən nəinki pissən, həm də məni incitdin”.

Mənbə bildirib ki, Messi ötən mövsüm Vitinya ilə bir neçə dəfə mübahisə edib, hətta onu PSJ-dən başqa kluba göndərməyi xahiş edib. Nəticədə Messi özü yayda “İnter Mayami”yə keçib.

Messi iki il PSJ-də oynadıqdan sonra 2023-cü ilin yayında Amerika klubuna keçib. O, ilk oyunda cərimə zərbəsindən qol vuraraq klubda debüt edib. "İnter Mayami"də keçirdiyi 12 oyundan sonra Messinin hesabında 11 qol və 5 məhsuldar ötürmə var.

Avqustun 20-də argentinalı Amerikada ilk kubokunu qazanıb. "İnter Mayami" turnirin final matçında "Neşvill"i penaltilər seriyasında məğlub edərək (10:9) Liqa Kubokunu qazanıb.