“Azərbaycana idxal olunan avtomobillərin müəyyən hissəsi müasir tələblərə cavab vermir. Çünki vətəndaşların yeni avtomobil almağa maddi imkanları yoxdur, əsasən, köhnə avtomobillərə üstünlük verirlər. Bu gün ölkədə avtomobillər üçün nəzərdə tutulan aksiz vergiləri, gömrük faizləri və vergi dərəcələri çox yüksəkdir. Əgər bu faizləri aşağı endirsələr, ölkəyə daha yeni və müasir avtomobillər gətirilər”.

İndex.az xəbər verir ki, bunu Bakupost.az -a açıqlamasında iqtisadçı ekspert Natiq Cəfərli deyib.

O bildirib ki, bu gün Almaniyada 6-7 min dollara alınan avtomobili Azərbaycana gətiriləndə ona bir o qədər də gömrük rüsumu qoyurlar:

“Hesab edirəm ki, xaricdən gətirilən avtomobillərin gömrük rüsumlarının hesablanması mexanizminə yenidən baxılmalıdır”.

N.Cəfərli qeyd edib ki, gömrük rüsumu və vergi dərəcələrinin əsas qayəsi daxili bazarın və istehlakçıların hüquqlarının qorunması yönündə addımların atılmasıdı. Amma indi daxildə istehsal yoxdur, xaricdən gətirilənlərə də maksimal dərəcədə qiymət, rüsum və vergi tədbiq olunur:

“Bu problem aradan qaldırılsa, ölkəyə buraxılış ili təzə avtomobillərin gətirilməsi sürətlənəcək və nəticədə avtoparklar yenilənəcək”.