Kəmalə Alıyeva
Quşların elektrik naqillərində rahat dayandığını görmək çoxumuz üçün olduqca adi bir mənzərədir.
Ancaq bu, quşların elektrik cərəyanını necə keçirmədiyi ilə maraqlananlar üçün maraqlı bir tapmacaya çevrilə bilər.
İndex.az xəbər verir ki, quşların bu qabiliyyəti elektrik cərəyanının necə işlədiyinə dair əsas fizika prinsipinə əsaslanır.
Elektrik cərəyanı əslində sadə dillə izah etsək elektronların hərəkətidir. Onlar elektrik stansiyalarından evlərimizə və cihazlarımıza qədər uzanan qapalı bir dövrədə hərəkət edirlər.
Elektronlar daha yüksək elektrik potensialından aşağı potensiala axır.
Quş məftil üzərinə qonanda onun ayaqları arasında potensial fərq yoxdur. Elektronlar hərəkət etmək üçün səbəb tapa bilmirlər, buna görə də quşun bədənindən keçmirlər.
Əgər quş müxtəlif potensial daşıyan iki naqilə toxunarsa, o zaman elektrik cərəyanı quşun bədənindən keçərək onu zədələyə bilər.
Bəs bu vəziyyət niyə insanlar üçün fərqlidir?
İnsanlar ümumiyyətlə yerlə təmasda olurlar. Bu, yüksək potensiallı naqillə təmasda olduğumuz zaman vücudumuzun cərəyanı aşağı potensial yerə doğru aparmasına səbəb olur.
Buna görə elektrik cərəyanı alırıq. Ona görə də elektrik xətlərini təmir edən işçilər izolyasiya materiallarından istifadə edirlər.
Bir sözlə, quş deyilsinizsə, elektrik naqillərindən uzaq durun.
